पुणे शहर :- संपूर्ण देशात व पुणे शहरात कोरोना विषाणूचा प्रादुर्भाव मोठ्या प्रमाणात व झपाट्याने वाढत आहे. हा प्रादुर्भाव रोखण्यासाठी केंद्र व राज्य शासन आणि पुणे मनपाच्या प्रशासकीय पातळीवर प्रतिबंधात्मक उपाययोजना युद्ध पातळीवर अहोरात्र राबविण्यात येत आहेत.
प्रशासकीय सर्व पातळ्यांवर/ स्तरावर / आघाड्यांवर जरी काम चालु असेल तरी सामाजिक बांधिलकी जपणाऱ्या व्यक्ती/ संस्थेच्या वतीने पुणे मनपास वेगवेगळ्या पातळ्यांवर तसेच शहरातील तळागाळातील नागरिकांसाठी मदतीचा हात मिळत असतो. त्याप्रमाणे पुणे महानगरपालिकेतील परिमंडळ क्र. ४ चे मा. उपायुक्त, श्री. संदीप कदम यांचे वतीने त्यांचा मार्च महिन्याचे संपूर्ण वेतन र.रु. ७५,७६७/- (चेक नं. ४६९७९२ दि. २९/४/२०२१) पुणे महानगरपालिकेस मदत म्हणून मिळाले आहेत.
याप्रसंगी मा. महापालिका आयुक्त विक्रम कुमार यांनी सांगितले कि, कोरोना विषाणूचा प्रादुर्भाव रोखण्यासाठी मा. उपायुक्त, श्री. संदीप कदम यांच्या सारख्या सामाजिक बांधिलकी जपणाऱ्या व्यक्ती/ संस्थेच्या वतीने सहकार्य मिळाल्याने प्रशासनास किंवा शासन यंत्रणेस निश्चितच एक प्रकारची उर्जा मिळाली आहे. या राष्ट्रीय आपत्तीवर मात करण्यासाठी आपल्यासारख्या व्यक्ती/ संस्थांनी मोलाच्या सहकार्याचा हात पुढे केलात, त्यामुळे आपण सर्व मिळून कोरोनावर निश्चितच मात करू असा मला विश्वास आहे. तसेच आपले सहकार्य व पाठबळ भविष्यातही निश्चित मिळेल याची मला खात्री आहे असे म्हणून मा. महापालिका आयुक्त विक्रम कुमार यांनी मा. उपायुक्त, श्री. संदीप कदम यांचे अभिनंदन केले.
